URUKUNDO:IYO UTAKIBONA AKANA KO MU JISHO

Abantu benshi bashaka ifoto.Bakundana n'ifoto y'umukunzi w'agatangaza batekereza mu mitima yabo.Ukunda arareka gusa akibonera uruhande rwiza rw'uwo akunda akirinda cyangwa akirengagiza kubona uruhande rubi.

Ibibazo bitangira kuboneka iyo amaso atangiye guhumuka.Iyo urukundo atakiri impumyi, rwatangiye kubona.Icyo gihe ibikarito wari wikinze mu maso biba bimaze kugwa, ukuri kugiye ahagaragara,umaze kubona umuntu ari nk'undi.Ko umukunzi wawe ashobora kurangwaho igitotsi.Uko iminsi iha amezi,amezi na yo agaha imyaka,ni ko ibikarito bigenda bigwa n'urukundo rukendera, kuko ukuri ariko kugenda kujya ahagaragara.

Nibwo rero umuntu atangira kubwira undi ati"warahindutse,uko umeze ubu siko nkuzi".Mu by'ukuri ntaba yarahindutse, ahubwo ubu ni bwo uba utangiye kumumenya by'ukuri, kuko mbere amaso atabona y'urukundo ntiyatumaga umubona neza,
wiboneraga gusa

ari ihogoza,
ari maso y'inyana,
aseka zigata izazo,
ari marebe atembaho amaribori,
ari nyambo iruta ibigarama,
ari nugururiye inyange, ari umwari utagira inenge, akubwira ati"ngwino mugabo wanjye"
warahindutse umusizi w'umusinzi,
ntaho utaniye n'umusazi kubera urukundo,
utaha mu rugo umutaka,
ukirirwa umuririmba,
imivugo n'ibisigo byose ari ibye.

Abantu b'ubwo bwoko ntibagira amakosa.Nyamara iyo igihu cy'urukundo rw'ubuhumyi gitamurutse ushobora kubona uwo ukunda by'ukuri uwo ari we.

Benshi barongora inzozi, nyamara iyo bukeye, mutakirebana akana ko mu jisho, mugomba kuzinduka mukajya gutabira ibijumba,mugomba kurera abana, ukuri kuragaragara.

KWEMERA UMUKUNZI WAWE UKO ARI

Ukimara gukanguka, akana ko mu jisho kakimara kuzimira, mwemere uko umusanze,mwemere uko ari,mwemere n'amakosa ye n'intege nke ze, nubwo yaba agutesha umutwe akakubuza amahoro n'amahwemo,mwemere utyo mugerageze gukemura ibibazo aho kumujugunya mu kidobo k'imyanda! Emera ko adashobora kuba mwiza 100% nk'uko nawe bitagukundira.

IBIMENYETSO BIGARAGAZA KO WANANIWE KWEMERA UMUKUNZI WAWE UKO ARI

-ukwijujuta,
-kwigira intakoreka,
-umunabi,amagambo n'intonganya by'urudaca,
-guhigima, -agasuzuguro,n'ibindi byerekana ko atakigushimishije na gato kandi ko ntacyo yakora ngo kikunezeze.

Ibikorwa nk'ibi bisenya urukundo kandi bishobora no kururimbura.Umuti ni ukwihangana no kumwemera nk'uko nabivuze haruguru.

Related Posts by Categories