Ibisigo Nyabami- RUREZI -MBWIRE UMWAMI UKWO ABANDI BAMI BANTUMYE

MBWIRE UMWAMI UKWO ABANDI BAMI BANTUMYE = JE VIENS TRANSMETTRE AU ROI LE MESSAGE DES AUTRES ROIS

Ce poème est de la catégorie « Ikobyo ». Cet intitulé reprend celui du pème de Musare alors que les contenus des deux poèmes sont différends. Celui-ci traite du thème de l’escatologie. Pour ce faire, l’auteur imaginé une visite auprès des anciens monarques défunts, là où ils sont aujourd’hui après leur départ de ce monde.

Mbwire Umwami
Ukwo abandi Bami bantumye,
Batumikira ba Ngoboka ya Rubazi
Ruboneza* azagabira i Mashengura.
005 Rumeza* anyure mu Rweya,

Arwane mu Nenwa,
Ajye gusenya ijabiro rya Mushira-mpuhwe.
Icyo gihe nyine Abasizi musanganywe
Babyaye imisigi*,
010 Mu misizi* ya Gisangira-ntama na Ntaratsi.

Naje nje kubabwira
Icyo yamariye Nteri*,
I Ntarabuka bakagomba kuhajya.
Icyo gihe nyine abarorerezi
015 Bazaba ari benshi


Kwa Birori bya Bitugu*,
Mu Museke mpawe ikirago kwicara.
Abatoni bamwibutsa abasizi yatunze,
Bucya bibukiranya amagambo yawe.
020 Nzagenda mvuga inkuru,

Ko wagwirije ibyaro Myano-mike
Ya Myambi ya Rubazi,
Mbwira Rwambura* i Buniga-ntama*.
Nguko ukwo nzabwira Ababyeyi*
025 Aba Bumva ku mwezi no mu rwisekera*,
Bazamvunya vuba.
Bahuza impundu Abami
Ba Bwama-mpundu* na Bukuyo*.
Ziravuga rirarenga i Busekera*
030 Ziba urwunge muri ba Nyina b’Abami,

Ababyeyi b’i Mutaraka
Barazimusanganiza ingoma.
Kizi nzaba ndi ku Kirago
Cya Kiragira na Kirega-ncuro,
035 Ku muki iwa Nyarugendo.

Ubwuzu nzanye buhuye n’ubwo musanganye,
Mbe uzi ko wahoreye Mukaranganya-ruge*.
Icyo gihe nyine abasizi musanganywe
Basesa urwuya,
040 Basumana imyishywa bahururana impundu.

Mu Ntagenda za Byanga-kuzika* na Butare*,
Mutukura* itekanye na Mukesha-jabiro*.
Umugabekazi ni we uzambariye impumbya*,
Muka Karume* yagabye,
045 Ikamubanza ingororano.
Emwe na njye nabona inkuru y’inkuke
Ya Rubarira-kwesa* rwa Bicuba*,
Mbwira ab’i Cano na Muca-nkamba*.
Nimuhumure zahawe Nyirazo,
050 Rubanza-mbuga rwa Rwinyege

Rugwe akwiye Rugogwe*.
Ukwiye ba so Rwesa*
Rwa Rwasa-nkonji* Rwasa-mizo,
Nzaba ngeze i Mwanza wa Mugaya-nzu.
055 Agira nyina w’inganji

Se akaba ingoga,
Yagira ubutwari akamusa Rwesa-Burega.
Yaganije* ubugongo*, Rugondo
Rwa Rugonda-muheto* na Rwabunga*.
060 Bati: uko wamwitegereje, areshya ate ?

Nti : urugero ni Mibambwe
Mu kurasana Kirasana* yenze umuheto,
Areshya na Yuhi.
Bati: harya yarasana angana iki Rukabuza
065 Rwa Rukora-ntambara* na Nyirarukundo,

Agitora umuheto awenda ate ?
Nti : awukoraho abari ku mbizi ya Rubabo,
Rubuguza afoye bakawogogaho.
Ye bene i Kabanza*
070 Ba Kabanza-ngabo* na Kabanza-bucya*,

Baciye inzira ya Bwanga-kugarura*.
Ye banyurana b’i Butwaza-ngeri
Ngabo-ivuna-ingoma* ajya gutsinda,
Kibiri* i Cyanga-kwaka*.
075 Ye Muringana* wa Muringa-ruge,

Ye Ngabo zatahanye n’amikoro mu Bukaba-soko,
Bagaca intaho i Muhanda.
None ndiziguye, Muzigura-nkiga
Wa Muzigura-ndekezi wa Ndakize,
080 Bukiriro, ndanga umugayo wawe.

Nteguye ingoro zawe Nzogera ya Ruhima*.
Ndashishikara ugashoza,
Nizihiriwe imfizi ya Gacura-nkumbi
Sinatendewe* Nyamurunga*.
085 Nagufashije abakeba,

Makiriro ya Rumeza
Warishe ndasangira.
Urandagirire abana Mbabazi
Wahawe inka ndatamba,
090 Ngatambira imihayo.

Nkubwire nkiri maso ntagenderana,
Ngiye njya gutanga igihe i Buniga*-ntama.
Nkiri aho ntaho ndajya
N’amazimwe nabwiwe yabagiriye i Kaniga,
095 Kuza kuzirika.

Wankundiye ngatinda kugenda.
Naho werekera iyo,
Nkitaba iyo mpamagarwa.
Nubu ndavuga ngenda
100 Nkazatinda kugaruka,

Ariko umwitego* si ubwoba Butakiro
Natumirwa ndi iyo sinagomba kuza.

Related Posts by Categories