Indirimbo-Sindagira unsange-Ntibahanana

Sindagira Unsange

Indirimbo ya Ntibahanana

Mugabo wanjye mugabo nkunda

Ngarukira sinagusenze

Nti sinagusanze nisanga

Kuva mu bwangavu no mu bukumi bwanjye

None aho mbereye ngeli y'urugo rwawe

Ndandagara nkagandurwa n'abagenzi

Nditsamura nkikirizwa n'abahetsi

Nahindukira nkumva ncitse umugongo

Nkagangahurwa n'ubwigunjye

Naragiwe n'ubwigenge bwawe

Sindagira unsange dusabane,

Nka kera utarasuhuka

Kera nkikiri rudasumbwa

Ukinsimbagiza abasizi bakansingiza

Na njye ubwanjye naragukunze,

Reka kwiheza mu rwawe

Ngo ushiturwe n'amahanga

Reka kurarikira iby'isi

Bituma udashyigikira urwo washinze

Garura umutima mu byawe mugenzi

Dore inka zirakamwa ibigega birahunitse

Imice yabuze kibeyura inkangaza rukabugira

Inzara ihari ni imwe,

Ni intimba y'umutima ugukunda

Erega iwacu ni ahantu

Sinagishijwe na Ruzagayura

Sinahunze amahoro ya karande

Ni impamvu y'uguhoza ni yo yanteruye

Sindi ikinege sindi n'ikinegu

Sindi impunzi sindi n'imfubyi

Sindi igicibwa sindi n'incike

Naje mpuruje n'uruga,

Urugamba rw'urukundo rwo kubaka urwacu

Related Posts by Categories