Eugene Kaspersky

Abantu bakoresha mudasobwa kenshi bajya bumva ijambo Kaspersky, ariko ntibazi ko ari izina ry’umuntu. Uwo nta wundi ni umurusiya Evgeniy Valentinovich Kasperskiy akaba ari umuhanga mu kurinda amakuru yo muri mudasobwa (information security).

Kaspersky rero yavukiye i Novorossiysk mu cyahoze ari Leta Zunze Ubumwe z’Abasoviyeti (URSS) mu kwakira 1965. Azwiho kuba yarakundaga imibare cyane ku buryo akiri muri secondaire yakurikiraga amasomo yatangwaga na Kaminuza ya Leta ya Moscou, akaba yari agenewe abanyeshuri bafite ubwenge butambutse ubw’abandi (gifted students).

Yize mu ishuri rikuru ryitwa Institute of Cryptography, Telecommunications and Computer Science rya KGB na Minisiteri y’ingabo y’abarusiya, arangiza muri 1987 muri Mathematical Engineering. Yahise ajya gukorera ikigo cy’ubushakashatsi kugera muri 1991. Akiri muri icyo kigo, computer ye yatewe na virus yitwa Cascade ; ibi bikaba byaratumye atangira kwiga cyane ku byerekeye amavirusi ya mudasobwa kuva muri 1989.

Muri 1991 yagiye gukora muri KAMI Information Technologies Center, aho we na bagenzi be bakoze antivirus ya AVP. Iyi antivirus yatsinze irushanwa ryari ryabereye i Hamburg mu Budage mu mwaka wa 1994, ikaba yarerekanye imbaraga zo kuvumbura amavirus ya mudasobwa kurusha izindi antivirus zari zizwi muri icyo gihe.

Muri 1997, nibwo yashinze ikigo Kaspersky Lab, cyahise kiyoborwa n’uwari umugore we muri icyo gihe ariwe Natalia Kasperskaya kugeza muri 2007 ubwo Eugene yahise akiyobora (CEO) kugeza n’ubu.


Hagati aho mu mwaka wa 2000, ya antivirus ya AVP yahinduriwe izina iba Kaspersky Anti-Virus benshi tuzi, ikaba ikoreshwa cyane cyane muri environnements Microsoft Windows na Microsoft Windows Mobile. Iya nyuma akaba ari 8.0.0.506 izwi nka Kaspersky Anti-Virus 2009. Hagati aho harategurwa Kaspersky Anti-Virus 2010, ikaba iri gukorerwa publicité ikomeye. Muri iyi publicité berekanamo igihangange Jackie Chan yambaye ingabo (helmet) ya Kaspersky, ari guhana bikomeye amavirus ! Iyi publicité kandi irimo na Eugene ubwe, dore ko aba bagabo bombi ari nk’inshuti bakaba bafatanya mu mishinga itandukanye.


Kugeza n’ubu, Eugene Kaspersky aracyakora ubushakashatsi ku ma virus yo muri mudasobwa, akaba ahugukiwe cyane mu byerekeye malware, iyi ikaba ari virus izwiho kwangiza cyane (harm) mudasobwa nyirizina mu gihe izindi nyinshi zo zibasira ibirimo. Kaspersky yita kandi ku ma virus aturuka muri internet. Niyo mpamvu yashinze urubuga (website) Viruslist.com, rukaba ruha abantu amakuru ku byerekeye na virus zo kuri internet.

Mu buzima busanzwe, Eugene Kaspersky ahora yatumiwe mu manama atandukanye ku isi, kugira ngo atange ibiganiro nk’impuguke. Ni umwe mu banyamuryango b’imena ba Computer Antivirus Researchers’ Organization (CARO), umuryango uhuriramo impuguke rwamwa mu byerekeye Anti-Virus.


Abamuzi bavuga ko akunda kwinywera whisky mu gihe abarusiya bamenyereweho kwisomera vodka. We n’uwahoze ari umugore we Natalya Kasperskaya bafite imigabane irenga 80% muri sosiyete ikomeye Kaspersky Lab, ni ukuvuga ko ari abaherwe bitambutse Mirenge ku Ntenyo.

Related Posts by Categories