Urutonde rw'ibigo 10 bitanga akazi kurusha ibindi ku isi

Nkuko biherutse gutangazwa n’ikinyamakuru The Economist, amasosiyete atanga akazi kurusha ayandi ku isi ahanini ni ayegamiye kuri za Leta. Nkuko bigaragara ku rutonde rw’icumi muri yo, 3 gusa niyo yikorera ku giti cyayo, vikaba bimaze kugaragara ko ihangwa ry’imirimo Atari imbogamizi mu bihugu bikennye gusa ndetse n’ibikize, ikibazo cyafashe intera itoroshye muri iyi minsi hagaragara ihungabana ry’ubukungu ku Isi.

Dore uko uru rutonde ruhagaze:

#1 Minisiteri y’ingabo ya USA:

Iyi minisiteri ifite abakozi bagera kuri miliyoni 3,2 baba abasirikare ndetse n’abasiviri ( 700 000 hirya no hino ku isi)
Ingengo y’imari ikoreshwa n’iyi minisiteri ibarurirwa kuri miliyari zirenga 550 z’amadolari.

#2 Igisilikare cy’Ubushinwa

Nkuko bigaragazwa n’ibarura ryakozwe mu w’I 008, uru rwego rwari rufite abakozi bagera kuri miliyoni 2,3 Nkuko bitangazwa na The Economist, kumenya neza neza ingengo y’imari y’iki gisilikare ni akazi katoroshye, dore ko kivanga mu bikorwa binyuranye nk’inganda n’ibindi. Ikigereranyo gitanga miliyari 95 z’amadolari mu wa 2011.

#3 Walmart (USA) miliyoni 2,1 z’abakozi !

Muri USA, nyuma ya minisiteri y’ingabo haza isosiyete yigenga Walmart izobereye mu by’ubwikorezi bw’ibicuruzwa binyuranye (distribution). Ifite abakozi bagera kuri miliyoni 2,1. Yigeze kunugwanugwa guhagarikwa kubera ibirego by’idumbanya ry’imishahara ngo riyirangwamo.
Igice kinini cy’aba bakozi bayo ni abari n’abategarugori.

#4 McDonald's (USA): abakozi miliyoni 1,7
Iyi ni ishene ya za restaurants ziri hirya no hino muri USA. Niyo sosiyete ya kabiri yigenga itanga akazi kurusha ibindi bigo byose ku Isi. Uyu mubare ushobora kwiyongera dore ko ubuyobozi bwayo bufite gahunda yo gufungura amashami mu Bushinwa.

#5 China National Petroleum corporation : abakozi miliyoni 1,7
Ifite abakozi bajya kungana n’aba Mc Donalds usibye ko yo ari iya Leta y’Ubushinwa. Ni isosiyete nini cyane: ikoresha amafaranga (chiffre d’affaire) agera kuri miliyari 190 z’amadolari buri mwaka (imibare ya 2011).


#6 State Grid Corporation of China : 1,6 million
Iki ni ikigo gishinzwe ikwirakwizwa ry’amashanyarazi mu Bushinwa. Gifite abakozi batari bake : miliyoni 1,6. Imibare y’akayabo gikoresha (chiffres d’affaire) ingana na miliyari ziyingayinga 70 mu madolari ya Amerika. Kimaze gushyikiriza amashanyarazi abagera kuri miliyari 1 y’abaturage.

#7 National Health Service (Grande-Bretagne) : 1,4 million
Urwego rw’ubuzima mu gihugu cy’Ubwongereza (England), urwego rukumbi rwo ku mugabane w’Uburayi rugaragara kuri uru rutonde. Rukoresha abagera kuri miliyoni 1,4 ni ukuvuga 2,5% by’abaturage b’igihugu cyose.

#8 Indian Railways :
Iyi ni ikompanyi ishinzwe iby’ubwikorezi bwa za gariyamoshi yo mu Buhinde, ifite abakozi bagera kuri miliyoni 1,4. Servisi zayo zigera ku bantu miliyoni 30 buri munsi ! Mu ntangiriro za Nzeli uyu mwaka yahawe inguzanyo ya miliyoni 500 z’amadolari na Banki y’iterambere ya Asia mu rwego rwo kunoza imikorere yayo ndetse no kongera ibirebana n’umutekano.

#9 China Post Group :
Uru ni urwego rw’amaposita mu Bushinwa. Rufite abakozi bagera ku 900 000. Ni rumwe mu nzego za leta y’Ubushinwa zikoresha abakozi benshi cyane.

#10 Hon Hai Precision Industry (Taiwan) :
Uru ni uruganda rubarizwa mu gihugu cya Taiwan, rukora imirimo igendanye na electronics (guteranya za Iphone na Ipad). Rufite abakozi babarurirwa ku 800 000 !

Related Posts by Categories